ពិតជាដូចពត៌មានដែលចេញផ្សាយកាលពីដើមខែឧសភាកន្លងទៅមែន ដែលថា Intel មានគម្រោងធំពិសេសមួយផ្សេងទៀត ដើម្បីបំបាក់ AMD ហើយទីបំផុត គម្រោងធំមួយនេះត្រូវបានប្រកាសជាផ្លូវការហើយ នៅក្នុងព្រឹត្តិការណ៍ Computex ឆ្នាំ 2017 នៅក្នុងទីក្រុងសៀងហៃ កាលពីប៉ុន្មានម៉ោងមុននេះបន្តិច។ ការប្រកាសនោះ ស្ដីអំពីអាវុធធំថ្មីស្រលាងមួយផ្សេងទៀតរបស់ Intel គឺបន្ទះឈីប CPU ឈ្មោះថ្មីត្រកូល Core i9 ដែលចេញគ្រងដំណែងត្រកូល Core i7 ដែលធ្លាប់តែខ្លាំងជាងគេប៉ុន្មានជា 6-7 ឆ្នាំកន្លងមកនេះ។
ជាមួយនឹងការប្រកាសចេញជាផ្លូវការនូវបន្ទះឈីប CPU ត្រកូលថ្មីនេះ គឺមានប្រើតែនៅលើម៉ាស៊ីន Desktop តែប៉ុណ្ណោះសម្រាប់ក្ដារដំបូងនេះ ដែល Intel ចេញ Core i9 ឡើង គឺផ្ដោតសំខាន់ទៅលើល្បឿនដ៏អស្ចារ្យរបស់វា កុំឲ្យ AMD បានចិត្តពេក ព្រោះថា Core i9 មាន Core និង Thread ច្រើន សម្រាប់កុងគ្នាជាមួយ Ryzen ដោយក្នុងនោះ Intel Core i9 ដែលបានប្រកាសចេញគឺចែកចេញជាលេខធុនមធ្យម រហូតដល់លេខកប់ជាពពួក Extreme Edition ដូចខាងក្រោមនេះ៖
- Intel Core i9 7800X មាន 6 Cores និង 12 Threads
- Intel Core i9 7820X មាន 8 Cores និង 16 Threads
- Intel Core i9 7900X មាន 10 Cores និង 20 Threads
- Intel Core i9 7920X មាន 12 Cores និង 24 Threads
- Intel Core i9 7940X មាន 14 Cores និង 28 Threads
- Intel Core i9 7960X មាន 16 Cores និង 32 Threads
- និងខ្លាំងអស់លេខគឺ Intel Core i9 9780XE មាន 18 Cores និង 36 Threads
រាល់ CPU ស៊េរី Intel Core i9 ទាំង 7 លេខនេះគឺល្បឿន និងទំហំ Cache ផ្សេងគ្នាទៅតាមតម្លៃ និងកម្លាំងផ្ទាល់ ដោយវាស៊ីភ្លើងតិចថែមទៀតចន្លោះពី 140W ទៅ 165W ប៉ុណ្ណោះ បើទោះបីជា CPU មួយចំនួននៅមិនទាន់បានបង្ហាញលក្ខណៈសម្បត្តិពេញលេញជាផ្លូវការក៏ដោយ។ ម្យ៉ាងវិញទៀត រាល់ត្រកូល Core i9 ទាំងអស់ គឺបើកសិទ្ធិឲ្យម្ចាស់របស់វាធ្វើការ OverClock ល្បឿនបានយ៉ាងចាស់ដៃទៀតផង ទៅតាមប្រភេទ Motherboard និងដែកត្រជាក់ ឬធុងទឹកបន្ថយកម្ដៅជាដើម ថែមអាចអាច Support ជាមួយនឹង RAM ប្រភេទ DDR4-2666 ជាមួយ 44 PCIe 3.0 Lanes ជាដើម។
ក្នុងនោះ CPU ដែលកំពុងលោតក្នុងតារាងកំពូល ហើយកំពុងធ្វើឲ្យអ្នកស្រលាញ់កុំព្យូទ័រលង់ចិត្តនោះគឺ Core i9 7980XE ដែលមកពីពាក្យថា Extreme Edition គឺវាមាន Core ដល់ទៅ 18 និង Thread ចំនួន 36 ដែលតម្លៃលក់ក្នុងទីផ្សារគឺ 1999$ ដែលវាមានសមត្ថភាពខ្ពស់ក្នុងការផ្គត់ផ្គង់កម្លាំងទៅដល់អ្នកមានតម្រូវការខ្ពស់គ្រប់វិស្ស័យ លើកលែងតែម៉ាស៊ីន Server ចេញប៉ុណ្ណោះ។ មិនត្រឹមតែមាន Core i9 ស៊េរី X នោះទេ Intel ក៏បានប្រកាសចេញនូវ Core i7 ស៊េរី X ចំនួន 3 លេខ និង Core i5 ស៊េរី X ចំនួន 1 លេខផងដែរ ដែលអតិថិជនអាចជ្រើសរើសបានទៅតាមទឹកប្រាក់ដែលអាចជះបាន។
គួរបញ្ជាក់ប្រាប់ផងដែរថា CPU ថ្មីខ្សែស្រឡាយ X នេះវាប្រើប្រាស់ Architecture ស្ថិតនៅក្នុងឈ្មោះ CPU ជំនាន់ទី 6 Sky Lake ផង និងជំនាន់ទិ 7 Kaby Lake ផង ដែលអាចយកទៅប្រើប្រាស់ជាមួយនឹង Socket ពពួក LGA 2066 បាន ដែលបច្ចុប្បន្ន Motherboard ប្រើ Socket នេះនៅមិនទាន់មានវត្តមានលក់នៅស្រុកខ្មែរយើងនៅឡើយទេ តែនឹងមកដល់ឆាប់ៗខាងមុខនេះ។ សម្រាប់ប្រិយមិត្ត ដែលស្រលាញ់ ហើយចូលចិត្តដេញស៊េរីកុំព្យូទ័រ ឬចង់បានកុំព្យូទ័រមានកម្លាំងខ្លាំងលើសគេ តើអ្នកមានមតិយោបល់យ៉ាងណាដែរ ជុំវិញ Core i9 នេះ? ចង់បានវាមកប្រើប្រាស់ដែរទេ? បើចង់បានអ្នកត្រូវចំនាយលុយចាប់ពី 1000$ ឡើងទៅ ទើបបាន Core i9 ធនមធ្យមមួយគ្រាប់មកប្រើប្រាស់ ហើយបើជះដល់ជាង 2000$ នឹងបានអាលេខកប់ស៊េរីមកប្រើតែម្ដង ដូចបានបញ្ជាក់ខាងដើម។
Intel Core i9 នឹងចេញលក់ប៉ុន្មានលេខជាមុនសិននៅក្នុងខែមិថុនាខាងមុខនេះ ហើយសម្រាប់លេខកប់ៗនឹងចេញលក់នាចុងឆ្នាំ 2017 នេះ!!